Азыркы Кытай адабиятынын тарыхы

Кытай – көп миңдеген жылдык тарыхы бар үлкөн мамлекет. Анын өткөн карт тарыхын каза берсең түбүнө жетпейсиң, сөз кылып бүтпөйсүң. Бул учурларда анын жылдызы жаркырап бирде бийик көтөрүлсө, кай бир мезгилдерде төмөн түшүп турган. Антсе да ал азыркы доорго татыктуу түрдө келип жетип, азыр кийинкилерге аңыз болчу экономикалык жана маданий кайра жаралуусунун эң бийик тепкичи менен көтөрүлүп бара жатат. Бул өнүгүүгө жетишүүнүн башкы себеби Кытайдын социализм жолун тандап алуусу болду. Анда көп адашып, жаңылыштыктарды кетирсе да, талбаган эмгектин жана изденүүлөрдүн арты менен акыры жакшы ийгиликтерди жарата алды. Бардык тармактардай эле адабият да жашап жаткан доорунан сырт кала албайт. Андыктан ал дагы социализм дооруна өткөн 1949-жылдан бери ар түрдүү абалдарда болду, изденди, кемчиликтерди кетирди, артыкчылыктарын көрсөтө алды, ийгиликтерди жаратты. Акын-жазуучулар, дегеле көркөм адабият майданындагылар ушул учурда социалисттик Кытай адабиятын жаратуунун аракетинде болушту.